Kinkur komin í ætlanina

Foreldrabólkurin, sum stríðist fyri framhaldsdeild í Sankta Frans skúla, bað fyri einum mánaði síðani um fund við borgarstjóran. Men Heðin Mortensen hevur enn ikki latið við seg koma.

Foreldrabólkurin hevur tí aftur vent sær til býráðið fyri at vita, um ella nær fundurin verður. Men boðini úr býráðnum eru, at borgarstjórin er í summarfrí.

Foreldrabólkurin ikki mist vónina

Tí er framvegis ógreitt, nær ella um fundurin verður. Foreldrabólkurin í Sankta Frans skúla ásannar, at fyrsta slagið er tapt, tí eingin framhaldsdeild verður nú eftir summarfrítíðina.

Tað hava bæði Tórshavnar býráð og Mentamálaráðið staðfest. Foreldrabólkurin hevur tó ikki slept málinum, sigur Tóra Petersen, umboð fyri foreldrabólkin.

Foreldrabólkurin fer týsdagin á fund við umboðið fyri skúlastýrið, sum skal umboðað Sankta Frans skúla í arbeiðsbólkinum, sum skal gera tilmæli um framtíðar miðbýarskúla í Havn.

Ov nógv ógreið viðurskifti

Foreldrabólkurin heldur framvegis, at fleiri viðurskifti eru ógreið og standa ósvarað eftir býráðsfundin í Havn tann 16. juni.

Tá samtykti býráðið at taka undir við uppskoti hjá Helenu Dam á Neystabø um at seta ein arbeiðsbólk at gera tilmæli um framtíðar miðbýarskúla.

Arbeiðsbólkurin skal fyri 30. november í ár lata skúlastýrunum í Havn tilmæli, og í seinasta lagi 1. mars næsta ár skal endaliga tilmæli latast býráðnum.