Fingu Grønland fyri Vesturindisku oyggjarnar

At Danmark seldi Vesturindisku oyggjarnar til USA fyri 100 árum síðani, fekk eisini avgerandi týdning lagnu Grønlands, vísa skjøl í danska ríkisskjalasavninum.

Danmark seldi USA oyggjarnar fyri 25 milliónir dollarar, ella umleið 100 milliónir kr. í okkara peningi,  tann 4. august í 1916. 

Samstundis tryggjaði Danmark sær, at amerikanarar tóku undir við, at Danmark fekk valdið á Grønlandi, skrivar sjónvarpsstøðin TV2.

Stríddust við norðmenn

Um hetta mundið stríddust Danmark og Noreg um rættin til partar av Grønlandi. Norðmenn settu búgv á eysturstrondini, og danir vóru vestanfyri.

Tá Vesturindisku oyggjarnar vórðu seldar, fingu danir amerikanarar at skriva undir eitt skjal, sum sigur, at USA skuldi styðja Danmark í øllum málum, sum viðvíktu Grønlandi. 

Robert Lansing, sum tá var amerikanskur uttanríkisráðharri, skrivaði undir skjalið í New York.

Erik Gøbel, granskari á ríkisskjalasavninum, sigur við TV2, at skjalið er framvegis í gildi, hóast tað er hundrað ára gamlt. 

Støðin í Thule

Løgfrøðiliga er Grønland á donskum hondum. Tað var eisini atvoldin til, at USA noyddist at spyrja Danmark um loyvi at byggja støðina í Thule, sigur hann.

Danmark og grønlendska landsráðið stevndu seinni Noreg fyri altjóða dómstólin í Haag, og Danmark vann sakarmálið í 1933, serliga tí amerikanarar styðjaðu Danmark, sigur Erik Gøbel.

Tað bant USA seg til í skjalinum um Vesturindisku oyggjarnar 4. august í 1916. Tí er Grønland partur av ríkisfelagsskapinum, sigur granskarin á danska ríkisskjalasavninum við TV2.