Løgtingið bíðar eftir vinnunevndini

Tað gongur striltið at fáa semju um uppskotið hjá Høgna Hoydal, landsstýrismanni, at skerja fiskidagarnar 30 prosent, og síðan luta 15 prosent útaftur til teirra, sum brúka sínar fiskidagar. 

Formaðurin í vinnunevndin hevur roynt at fáa í lag eina breiða semju um uppskotið, men tað ber eftir øllum at døma ikki á mál, tí andstøðan mælir frá at skerja fiskidagarnar.

Tað vísir seg eisini at vera trupult at finna undirtøku í samgonguni fyri uppskotinum hjá landsstýrinum, tí Javnaðarflokkurin hellir meira til andstøðuuppskotið um ikki at skerja dagarnar, men Tjóðveldi tekur undir við uppskotinum hjá landsstýrismanninum.

Løgtingið bíðar framvegis eftir álitinum frá vinnunevndini. Tingfundurin varð niðurlagdur um hálvgum tvey tíðina, og løgtingsformaðurin boðaði frá, at hann verður tikin uppaftur klokkan 16.

Málið fiskidagarnar skal hava aðru viðgerð í tinginum mánadagin.