Hoyvíksvøllurin: Útbjóðingartilfarið verður broytt

Útbjóðingartilfarið verður broytt nakað, nú graslíkið til Hoyvíksvøllin, nýggja fótbóltsvøllin í Hoyvík, verður boðið út av nýggjum.

Mentanarnevndin hjá býráðnum samtykti mikudagin at bjóða graslíkið út av nýggjum, soleiðis sum umsitingin hjá býráðnum mælti til av fyrstan tíð, tí tilboðið, sum fyrst varð hildið vera tað lægsta, helt ikki treytirnar í útbjóðingartilfarinum.

Beint áðrenn býráðið skuldi taka støðu til málið á eykafundi, sendi Fíggjarnevndin málið aftur í Mentanarnevndina, tí nú var eitt tilboð frá einum øðrum veitara vorðið tað bíligasta.

Bjóðast út sum skjótast

Broytingin í útbjóðingartilfarinum er viðvíkjandi tilfarinum, sum er undir graslíkinum. 

Higartil hevur Tórshavnar kommuna brúkt tað, sum eitur tilfar, stoypt á staðnum, á graslíkisvøllum. Nú verður eisini loyvt at bjóða fram tilfar, sum er gjørt aðrastaðni, í høvuðstilboðnum.

Býráðið hevur biðið Landsbyggifelagið um at bjóða arbeiðið út av nýggjum sum skjótast.       

Býráðið vil hava eina avgerð um graslíkið sum skjótast, so tað kann leggjast á, áðrenn veturin kemur.