Danmark selur ikki partabrøv í SAS

Hóast Noreg og Svøríki hava selt burtur av sínum partabrøvum í SAS, ætlar Danmark ikki at selja partabrøv í skandinaviska flogfelagnum.

Tað sigur Claus Hjort Frederiksen, fíggjarmálaráðharri, sambært heimasiðuni Check-in.dk.

Norska og svenska stjórnin seldu herfyri tilsamans sjey prosent av sínum partabrøvum í SAS til privatar íleggjarar.

Noreg seldi 2,8 prosent, og norðmenn eiga nú bara 11,5 prosent av partapeninginum í flogfelagnum. SAS seldi 4,2 prosent, og eigur nú góð 17 prosent.

Danski parturin er góð 14 prosent.

Hava mist meirilutan í felagnum

Men Svøríki, Noreg og Danmark, sum tóku stig til at stovna SAS, eiga ikki longur meirilutan í felagnum. 57 prosent av partapeninginum eru á øðrum honum.

Ikki er greitt, hvør hevur keypt norsku og svensku partabrøvini, men helst eru tað íløgubankar, pensjónsgrunnar og aðrir íleggjarar. 

Kanska hava útlendsk flogfeløg eisini keypt partabrøv, skrivar Check-in.dk. 

Formaðurin í nevndini fyri danska partin av SAS, Frits Schur, væntar, at nú eru fyrstu stigini tikin at einskilja SAS. 

Hann sigur, at flogfelagið hevur 70 ár baki, og nú er stundin komin at flyta heimanífrá, sum hann tekur til í samrøðu við Ritzau.

Spyrja fólkatingið fyrst

Men Claus Hjort Frederiksen, fíggjarmálaráðharri, ætlar ikki at selja partabrøv í SAS, ið hvussu er ikki fyribils.

Hann sigur, at einki verður selt, fyrr enn flokkarnir í fólkatinginum hava sagt sína hugsan. 

SAS hevur boðað frá, at tað fer at stovna fleiri nýggjar rutur í vár. Ein teirra er millum Keypmannahavn og Vágar. Flogið verður hvønn dag, bæði í summar og vetrarhálvuni.