Viðgera nú kæru um Høgna Hoydal

Ætlanin var at hava fund um málið í síðstu viku, men hann var útsettur vegna forfall í nevndini.

Meginfelag Útróðrarmanna hevur kært Høgna Hoydal, landsstýrismann, og vil hava landsstýrismálanevndina at kanna embætisførsluna hjá landsstýrismanninum, tá hann gjørdi og legði fram lógaruppskotið um fiskidagarnar í fiskiárinum, sum byrjaði 1. september í fjør.

Meginfelagið heldur millum annað uppá, at Høgni Hoydal villleiddi løgtingið. Felagið heldur, at tingfólk í roynd og veru viðgjørdu málið og atkvøddu um tað í blindum.

Á fyrsta fundinum fer landsstýrismálanevndin at gjøgnumganga málið saman við nevndarskrivaranum.

Bárður Kass Nielsen, formaður í landsstýrismálanevndini, veit í løtuni ikki at siga, nær komið verður til eina niðurstøðu um annaðhvørt at fara upp í málið, ella at vísa kæruni frá sær.