Minnilutin vil hava Sjóvinnuhúsið fyri býráðið

Minnilutin í Tórshavnar býráð, Javnaðarflokkurin og Sambandsflokkurin, vilja hava málið um Sjóvinnuhúsið fyri á fyrstkomandi almenna býráðsfundi, soleiðis at býráðslimir fáa møguleika at siga sína hugsan um hetta hús.

Javnaðarflokkurin og Sambandsflokkurin vilja hava nýggja býráðsmeirilutan at svara, hvat hann ætlar við húsinum - um ætlanin er at leiga ella selja Sjóvinnuhúsið, og til hvønn?

Fróðskaparsetur

Ítøkiliga spyr minnilutin, um ætlanin er, at Fróðskaparsetrið skal flyta inn í Sjóvinnuhúsið, og um Mentamálaráðið hevur givið tilsøgn um at leiga ella keypa bygningin.

Minnilutin vísir á, at fyri býráðsvalið segði Tjóðveldi, at Sjóvinnuhúsið skuldi brúkast til vinnulig endamál burturav. 

Nýggi býráðsmeirilutin - Fólkaflokkurin, Tjóðveldi og Framsókn - hevur higartil ikki viljað sagt, hvat Sjóvinnuhúsið skal brúkast til.

Bíða eftir Mentamálaráðnum

Á tíðindafundi 3. januar segði Annika Olsen, borgarstjóri, at meirilutin bíðar eftir svari úr Mentamálaráðnum. Í tí svarinum liggur, hvørt Fróðskaparsetrið skal flyta inn í Sjóvinnuhúsið. Á tíðindafundinum varð upplýst, at svarið skuldi kommunan fáa 14. januar.

Sambært heimasíðuni hjá Tórshavnar kommunu verður býráðsfundur hósdagin.

Sjóvinnuhúsið er sett á skránna fyri fundin, eftir umbøn frá minnilutanum, men í skránni stendur einki um, hvat meirilutin ætlar við bygninginum.