Nú skal musikkskúlin í Havn byggjast

Tórshavnar kommuna fer nú undir samráðingar við Húsavarðartænastuna, sum hevði lægsta tilboð uppá at byggja Musikkskúlan. Tað skrivar heimasíðan hjá kommununi.
Kommunan hevur nú, eftir býráðsfundin hóskvøldið, broytt fíggjarætlanina so at tøkar eru góðar 26 miljónir at byrja við. 

Býráðssamgongan er samd um, at restin av fíggingini verður játtað í íløguætlanini fyri 2018 og 2019.

Musikkskúlin verður um 2.600 bruttofermetrar til støddar við stórum orkesturhøli, sum umframt at vera undirvísingarstað fyri stór kór og orkestur eisini er ætlað til framførslur við upp til 350 áhoyrarum. Øll undirvísingarhøli eru serútgjørd, har serligur dentur er lagdur á bestu ljóðviðurskifti, skrivar heimasíðan.

Avgjørt er eisini, at skúlin skal hitast við fjarhita.

Gunnvør Balle, forkvinna í mentamálanevndini, sigur við heimasíðuna, at vónandi verður sáttmáli undirskrivaður innan 1. apríl.