Hybridbilar eiga eisini at sleppa undan mvg

Føroya Arbeiðsgevarafelag undrast á, at hybridbilar, blendingsbilar, ikki eru við, nú landsstýrið ætlar at geva teimum, sum keypa sær ein bil, sum brúkar streym ella vetni í staðin fyri bensin ella diesel, meirvirðisgjaldið aftur úr landskassanum, tó í mesti lagi 70.000 kr.

Hybridbilar brúka til dømis bæði streym og bensin.

Arbeiðsgevarafelagið hevur annars ikki aðrar viðmerkingar um uppskotið um at broyta lógina um meirvirðisgjald. 

Eiga at gera uppskotini liðug

Felagið mælir tó til, at Fíggjarmálaráðið ger uppskotini liðug, áðrenn tey verða send til hoyringar.

Í tveimum førum stendur XX í staðin fyri tøl í lógaruppskotinum, sum Føroya arbeiðsgevarafelag fekk til hoyringar.

70.000 kr. í meirvirðisgjaldi svarar til, at bilurin kostar 350.000 kr. við meirvirðisgjaldi.

Prísurin fyri bilin verður tí 280.000 kr.

Galdandi í tvey ár

Lógarbroytingin skal koma í gildi 1.januar í ár, og hon verður galdandi í tvey ár. 

Frammanundan sleppa fólk undan at gjalda skrásetingargjald og vegskatt fyri elbilar og vetnisbilar.