Trygdarráðgevin hjá Trump leggur frá sær

Flynn hevur givið villleiðandi upplýsingar til m.a. varaforsetan, Mike Pence, um samrøður sínar við russiska sendiharran í USA.

- Eg havi av gáloysni kunnað varaforsetan og onnur við ófullfíggjaðum upplýsingum um telefonsamtalur mína við russiska sendiharran. Eg havi biðið forsetan og varaforsetan um umbering, og tað hava teir góðtikið tað, skrivar Flynn í uppsagnarbrævinum, sambært CNN.

       Les  uppsagnarbrævið hjá Michael Flynn

Samrøðurnar millum Michael Flynn og russiska sendiharran hava verið áðrenn Flynn tók við starvinum, og hava m.a. snúð seg um handilstiltøkini móti Russlandi eftir kríggið móti Ukreina,- og tað er hetta, sum Flynn hevur avnoktað yvir fyri Pencen, sum alment hevur vart Flynn.

Tað er lógarbrot, um ein sivilur kjakast um uttanríkispolitikk við eitt fremmant vald. 

Flynn, sum er general-loytnantur,  leggur frá sær eftir minni enn ein mánað í starvinum.

Pensjóneraður ráðgevi

Tað verður pensjoneraði generalurin, Joseph Keith Kellogg, sum fyribils fer at taka við starvinum sum trygdarráðgevi hjá Donaldi Trump forseta.

Hann hevur, sambært BBC, 30 ára royndir frá herinum, og hevur  verið í hertænastu í Vjetnam, Kambodia, Panama og í Flógvanum. Hann var ráðgevi undir Irak-krígnum frá 2003 til 2004, og hevur seinast ráðgivið Trumo um trygdina í sambandi við forsetavalstríðið.