- Tíðindi, mentan og ítróttur
Avlopið hjá Atlantsflogi vaks 10 mió. kr.
![](https://kvf.fo/sites/default/files/styles/grein-ovasta-mynd/public/screen_shot_2016-12-20_at_20.13.50.png?itok=vP1PUq0F)
Atlantsflog hevði 28 milliónir krónur í avlopi eftir skatt í fjør.
Ferðafólkatalið setti met, og tað ger, at úrslitið var so gott, sigur nevndin á ársaðalfundinum, sum var í gjár.
Úrslitið í fjør var meira enn 10 milliónir betri enn árið fyri, tí tey høvdu 15.000 fleiri ferðafólk á flogi sammett við 2015. Tilsamans flugu 282.000 fólk við Atlantsflogi í fjør.
Gjaldførið 130 mió. kr.
Gjaldførið var 130 milliónir krónur við árslok 2016, og tað er 87 milliónir krónur hægri sammett við ársbyrjan, tá felagið hevði 43 milliónir krónur í tøkum peningi.
Sølan av gomlu tyrlunum, lágur prísur á brennievni og størri avlop í tollfríu søluni í Vága Floghavn, sum Atlantic Airways eigur helvtina av, gera eisini góðan mun í tølunum.
Atlantsflog flýgur til 11 ferðamál beinleiðis úr Vágum.
Eitt A320-flogfar aftrat
Nýggja A320 flogfarið kom í flotan stutt fyri jól í fjør, og í summar fer Atlantsflog at leiga eitt A320 flogfar aftrat, sum kemur í staðin fyri eitt A319-flogfar, ið felagið hevur langtíðarleigað seinnu árini.
A aðalfundinum í gjár varð øll nevndin í Atlantsflogi afturvald. Niels Mortensen er formaður í nevndini.