Bústaðir í høvuðsstaðnum ávegis

Kommunan hevur áður selt óbygt lendi á Óðinshædd til Bústaðir fyri 156 krónur fermeturin.

Tað var í 2013, og tá fekk kommunan loyvi til søluna frá Innlendismálaráðnum at selja fyri 156 krónur fermeturin.

Kommunan hevur boðað Bústøðum frá, at hon vil fegin, at í minsta lagi triðja hvør íbúð verða bygd og innrættað til eldri fólk og fólk, sum hava ringt við at røra seg.

Fermetraprísurin er so lágur, tí Innlendismálaráðið vísir til lógina um Húsalánsgrunnin.

Endamálið við grunninum er, at øll í Føroyum skulu hava møguleika fyri at útvega sær bústað, at tryggja fjølbroytni á bústaðarmarknaðinum, og at stuðla upp undir veðurlagspolitikkin við at minka orkunýtsluna í bústøðum.

Sambært somu lóg kunnu kommunurnar virka saman við Húsalánsgrunninum um hesi mál.

Tí helt Innlendismálaráðið, at Tórshavnar kommuna røkir ítøkiligan, sakligan kommunalan áhuga við at selja jørð til Bústaðir.

Tá kommunan selur grundøkini undir marknaðarprísinum, skal kommunan tryggja sær, at kommunali áhugin verður røktur í samband við søluna, - at grundøkini verða nýtt til tað endamál, sum er treytin fyri søluni.