Glasir hevur ikki somu útbúgving sum í Klaksvík

Rektarin á Glasi hevur kunnað Mentamálaráðið um, at Glasir fer at bjóða út tøkni A sum eyka vallærugrein aftrat teimum fýra kravdu A-stigunum á náttúrubreytini.

Hetta kallar Glasir tøknileið.

Tað svarar Rigmor Dam, landsstýriskvinna, Bjørn Kalsø í Sambandsflokkinum, sum hevur spurt, um landsstýriskvinnan hevur góðkent, at ein útbúgvingarleið, sum líkist tøknibreytini á Tekniska skúla í Klaksvík, byrjar á Glasi í summar.

Rigmor Dam svarar, at útbúgvingin, sum verður boðin út á Glasi, er ikki tøknibreyt ella útbúgvingarleið, lík tøknibreytini á Tekniska skúla í Klaksvík, men talan er um vanliga náttúrubreyt við eyka vallærugrein.

Næmingagrundarlagið

Bjørn Kalsø spurdi eisini, hvørja ávirkan útbúgvingin á Glasi fer at hava á næmingagrundarlagið.

Rigmor Dam sigur, at landsstýriskvinnan hevur sum so eingi stig tikið í hesum máli, men tveir flokkar við 37 næmingum eru tiknir inn til fyrsta árið á tøknibreytini í Klaksvík næsta skúlaár, og at 12 næmingar valdu náttúrubreytina við tøkni A á Glasi.

Tí er eingin ábending um, at næmingagrundarlagið er skeiklað á skúlunum, sigur landsstýriskvinnan í mentamálum ís varinum til Bjørn Kalsø.