Útróðrarmenn ótolnast eftir niðurstøðu

Ivaleyst verða fiskidagarnir fyri næsta fiskiár ásettir, áðrenn Landsstýrismálanevndin svarar eini kæru um fiskidagarnar í hesum fiskiárinum, sum endar 31.august.

Høgni Hoydal hevur fingið freist til 7.august at svara viðmerkingum, sum Meginfelag útróðrarmanna sendi Landsstýrismálanevndini 2.juni.

MÚ ótolnast

Meginfelag útróðrarmanna ótolnast nú eftir niðurstøðuni hjá Landsstýrismálanevndini um kæruna hjá felagnum, sum varð send nevndini 13.desember í fjør.

Meginfelagið hevur kært Høgna Hoydal, landsstýrismann, fyri mátan, hann ásetti fiskidagar fyri árið 2016-2017.

Tað tykist løgið, nú løgtingið fer til hús og bara nakrar vikur eru til tingið skal áseta fiskidagar fyri næsta fiskiár, at eingin niðurstøða er, heldur Meginfelag Útróðrarmanna, sum spyr um niðurstøðan kemur, áðrenn fiskidagar verða ásettir fyri árið 2017-2018.

Ikki stundir

Landsstýrismálanevndin sigur seg ikki hava havt stundir til at viðgera málið liðugt. 

Landsstýrismálanevndin hevur tríggjar aðrar kærur, sum ikki eru avgreiddar, tvær um Høgna Hoydal og eina um Henrik Old.