Taks steðgaði pakkum við rúsdrekka og sigarum

Tað er ikki so snilt at fáa brennivín og sigarir sendandi við postinum, tí so er vandi fyri, at pakkin steðgar hjá tollarunum.

Skatta- og avgjaldskærunevndin hevur staðfest tvær avgerðir hjá TAKS um ikki at útflýggja tveir postpakkar. 

Í øðrum pakkanum var rúsdrekka, í hinum sigarir.

Rúsan einkarrætt

Orsøkin til avgerðirnar er tann, at bara Rúsdrekkasølan kann innflyta rúsdrekka.

Undantøk eru tó ferðafólk og altarvín.

Og tubbak kann bara innflytast til at selja, ikki til egna nýtslu.

Lógin, sum skal fáa føroyingar at roykja minni, sigur, at tubbak kann ikki innflytast til annað enn til vinnuligt endamál, tað er at selja.