Taka arbeiðið uppaftur í Eysturoyartunlinum

Arbeiðið í Eysturoyartunlinum verður nú tikið uppaftur, eftir at boriliðini hava verið í summarfrí.

Ein partur av manningini kom aftur til arbeiðis beint eftir ólavsøku, og í hesari vikuni verður øll manningin aftur til arbeiðis, Tá verður borað aftur við fullari megi bæði strandamegin og hvítanesmegin.

Nú er ein góður kilometur boraður tilsamans, og tað svarar til umleið 10 prosent av tunlinum, sum verður góðar 11 kilometrar langur. 

Áðrenn farið var í summarfrí, vórðu 622 metrar boraðir á Strondum og 393 metrar á Hvítanesi.

Tíðarætlanin heldur

Onkrar lekar hava verið í grótinum strandamegin, men sum heild hevur arbeiðið gingið væl, og tíðarætlanin heldur, sigur Teitur Samuelsen, stjóri í tunnilsfelagnum. 

Fyrsta skotið á Strondum varð latið av 21. februar, og fyrsta skotið á Hvítanesi var 27. apríl. 

Gongst sum ætlað, verður Eysturoyartunnilin liðugur í 2020.