Grønland: Eingin kunning um radarar í Thule

Grønlendska landsstýriskvinnan í uttanríkismálum, Suka K. Frederiksen, vil nú hava kannað, um allar mannagongdir eru hildnar í sambandi við, at tøkniliga radarútgerðin í Thule verður dagførd, skrivar Sermitsiak.

- Vit hava longu vent okkum til danska uttanríkisráðið um málið, sigur Suka K. Frederiksen.

- Tað er týdningarmikið, at alt, sum hevur við okkara land at gera, fylgir ásettum mannagongdum, sigur hon við Sermitsiak.

Tá Grønland, Danmark og USA gjørdu eina nýggja verjuavtalu í 2004, fekk USA heimild at uppstiga radaran í Thule.

Hetta var ein liður í amerikansku rakettverjuætlanini.

Ikki óvæntað

- Tí er tað ikki óvæntað, at radarin er dagførdur fyri umleið eina hálva milliard krónur, sigur granskarin í trygdarpolitikki á lærda háskúlanum í Keypmannahan, Kristian Søby Kristensen, við grønlendska kringvarpið, KNR.

Teldur og telduforrit í radaranum verða dagførd, og øll uppstigingin hevur við sær, at tær fimm early-warning støðirnar í Grønlandi fyri fyrstu ferð í 30 ár hava somu útgerð.

Amerkanska loftvápnið væntar, at øll dagføringin verður liðug í 2020, skrivar KNR.

Men tað, sum nú verður gjørt, er ikki í andanum í avtaluni, sum varð gjørd í 2004, sigur Hans-Jacob Helms, fyrrverandi flokskrivari hjá Siumut í fólkatinginum, í eini grein í Jyllands-postinum.

Ikki kunnað

Sambært avtaluni skal USA kunna bæði danskar og grønlendskar myndugleikar, áðrenn broytingar verða gjørdar, og tí átti Grønland at verðið kunnað um tær seinastu dagføringarnar í Thule, skrivar Hans Jacob-Helms.

Justus Hansen, formaður í uttanlandsnevndini hjá grønlendska landstinginum, sigur við KNR, at nevndin hevur einki frætt um málið. 

Og nú hevur landsstýriskvinnan í uttanríkismálum, Suka K. Frederiksen, vent sær til danskar myndugleikar at via, um allar mannagongdir eru hildnar í hesum málinum.