Norðmenn skulu telja atkvøður við hond

Kommunalmálaráðið í Noregi biðir allar kommunur um í minsta lagi einaferð at telja atkvøðurnar við hond á Stórtingsvalinum seinni í hesum mánaðinum.

Harumframt verður trygdin fyri telduskipanunum eisini herd.

Øktur áhugi fyri telduskipanini

Ein maskina telur atkvøðurnar, men eftir at Valstýrið, norski trygdarmyndugleikin og trygdartænastan hjá løgregluni hava mett um skipanina, hevur valstýrið gjørt av, at allar atkvøður skulu teljast við hond.

- Valskipanin í Noregi er royndarkoyrd og er trygg. Samstundis hava vit sæð vaksandi virksemi og áhuga útifrá fyri tøkniligu loysnunum, og tí halda vit, at tað er rætt at seta trygdartiltøk í verk, - og eitt av teimum eru at kommurnar skulu telja upp manuelt, sigur Jan Tore Sanner, ráðharri í kommunumálum, við norska TV2.

Hann metur tó ikki, at talan er beinleiðis um hackarar, men at økti áhugin fyri tøkniligu síðuni av valskipanini, ger, at trygdin er herd. 

- Tað hevur týdning fyri meg, at fólk hava álit til sjálva valskipanina og til valúrslitið.

Økt arbeiðsbyrða

Valúrslitið verður nakað seinkað av hesum, sigur Jan Tore Sanner, ráðharri í kommunumálum.  

Sum er, telja longu helvtin av kommunum atkvøður við hond, men fyri hinar kommunurnar verður hetta økt arbeiðsbyrða.