FNU vil hava økið vesturi á Víkum friðað

Føroya Náttúru- og Umhvørvisfelag hevur heitt á friðingarnevndina fyri Vága sýslu um at friða økið vesturi á Víkum í Vágum.

Mælt verður til at friða alt økið, frá Fjallavatni til Barðið.

FNU sigur, at hetta er ein náttúruperla, sum er nærum órørd av mannahondum.

Verður alivirksemi vesturi á Víkum, fer tað at gera stóran skaða á náttúru- og mentanarvirði í økinum, sigur FNU.

Føroya Náttúru- og Umhvørvisfelag sigur, at umhvørvisliga støðan  á havbotninum vesturi á Víkum er góð.

Sandurin reinur

Kanningar av zinki, kopari og lívrunnum evni vísa, at botnurin er ikki ávirkaður, og at sandurin er reinur. 

Laksaaling hoyrir ikki heima í tílíkari náttúruperlu, sigur FNU.

Tøðevni, heilivágur og sóttreinsingarevni verða latin út, og tey fara at ávirka lívfrøðina í økinum, sigur Føroya Náttúru- og Umhvørvisfelag í áheitanini á friðingarnevndina fyri Vága sýslu um friða økið vesturi á Víkum.