Fiskaaling fær lán frá landinum, ikki partapening

Løgtingið samtykti einmælt fyrrapartin at geva P/f Fiskaaling lán úr landskassanum og ikki partapenging fyri at koma fyri seg.

Poul Michelsen, landsstýrismaður, bað annars tingið um partapenging.

Men Vinnunevndin skeyt upp at lata lán í staðin fyri.

Ábyrgdarlánið, sum er 9,5 mió. kr., skal vera rentufrítt í hvussu so er til tað verður kravt aftur.

Lánið skal krevjast aftur í einum, ella í avdráttum, tá eginpeningurin hjá Fiskaaling er í minsta lagi 500.000 kr.  

Fíggjarnevndin samd

Fíggjarnevndin tók undir við uppskotinum hjá Vinnunevndini. 

Eitt ábyrgdarlán er fremmandafígging og fer ikki inn í eginpeningin hjá felagnum.

Lánið stendur í veðrætti aftan fyri øll onnur lán hjá P/f Fiskaaling. 

Lánið styrkir kredittvirði felagsins og kann loysa aktuellu fíggjarligu avbjóðingarnar hjá felagnum, sigur Vinnunevndin. 

Landið væntar at fáa peningin aftur, tá Lívfiskastøðin í Skopun er seld, tí onnur er bygd.

Lánið, sum Fiskaaling nú fær úr landskassanum, tryggjar felagið móti kreditorum, varð sagt í løgtinginum fyrrapartin.