Ráðgevi hjá Trump ákærdur fyri svik

Ráðgevarin, Paul Manafort, og fyrrverandi starvsfelagi hansara, Rick Gates, nokta seg sekar í ákærinum um skattasvik og ráðagerð móti USA. 

Paul Manafort stóð á odda fyri valstríðnum hjá Donald Trump frá juni til august í fjør.

Robert Mueller er settur at kanna málið um russisku uppíleggingina í amerikanska valstríðið, og ákærurnar móti Manafort og Gates eru liður í hesum arbeiði.

Teir eru ákærdir fyri at hava starvast sum agentar fyri politiskar flokkar, sum styðja Russland, frá 2006 til 2015.

Advokaturin hjá Paul Manafort, Kevin Downing, sigur, at eingi prógv eru fyri, at Manafort hevði samband við russisku stjórnina ta tíðina, hann stóð á odda fyri valstríðnum hjá Trump.

- Paul Manafort umboðaði átøk í Ukraina fyri ES, og hann arbeiddi eisini fyri, at Ukraina fekk tættari samband við ES og USA. Men hetta arbeiðið varð liðugt í 2014, meira enn tvey ár fyri, at Manafort gjørdist partur av valstríðnum hjá Trump, sigur advokaturin hjá Manafort.

Bæði Paul Manafort og Rick Gates góvu seg upp til samveldisløgregluna, og á einum rættarfundi í Washington í gjár vórðu teir settir í húsavarðhald.

Teir kunnu tó verða latnir leysir móti veðhaldi.

Næsti rættarfundur í málinum verður 2. november.