Puigdemont skal handtakast

Ein spanskur dómari hevur góðkent eina áheitan um at handtaka frákoyrda forsetan, Carles Puigdemont. Tað skrivar blaðið La Vanguardia.

Tað er ríkisákærin í Spania, sum hevur biðið um handtøkuna eftir at Puigdemont og fýra fyrrverandi ráðharrar ikki møttu til avhoyring í Madrid í dag. Puigdemont og ráðharrarnir eru í løtuni í Belgia.

Teir eru m.a. skuldsettir fyri at hava eggjað til uppreistur, eftir at Katalonia lýsti sjálvstýri 27. oktober.

Samstundis hevur dómstólurin gjørt av, at átta fyrrverandi limir í katalonsku stjórnini skulu varðhaldsfongslast. Ein kann latast leysur móti 50-túsund evrum í trygd, - tað svarar til 372-túsund krónur, skrivar blaðið, El Pais.