Viðmerkingarnar broyta einki, sigur Løgmálaráðið

Danska Løgmálaráðið heldur framvegis ikki, at ivi er um stjórnarskipanarligu støðu Føroya, nú tað hevur fingið viðmerkingarnar um uppskotið um føroyska stjórnarskipan.

Viðmerkingarnar vóru ikki tøkar fyrru ferðina, tað var 9.juli, Løgmálaráðið viðgjørdi stjórnarskipanina og støðu Føroya í ríkinum. 

Ríkisumboðið hevur umsett viðmerkingarnar og gjørt ein samandrátt á donskum um fyrstu viðgerð í løgtinginum. 

Løgmálaráðið leggur dent á, at eisini í viðmerkingum um inngangin í stjórnarskipanarlógini stendur skilliga, at føroyska stjórnarskipanarlógin ikki setir úr gildi galdandi stjórnarskipanarligu støðu Føroya í ríkinum.

Tað vil siga, at verandi skipan er ein løgfrøðiligur veruleiki, sigur Løgmálaráðið í einum uppriti.