Óseriøst at tingast í miðlunum

- Mær dámar ikki, at tingingar av tí slagnum, sum eru í løtuni, fara fram í miðlunum. Tað tykist ikki serliga seriøst, sigur Poul Michelsen, landsstýrismaður og formaður í Framsókn.

Boðini koma eftir, at Jenis av Rana í útvarpstíðindunum klokkan tvey í dag greiddi frá fundinum, sum hevði verið millum samgonguna og so teir báðar tinglimirnar hjá Miðflokkinum.

Poul Michelsen luttók ikki sjálvur á fundinum, tí hann skuldi av landinum tíðliga í morgun. Tí vóru tað Aksel V. Johannesen og Høgni Hoydal, løgmaður og varaløgmaður, sum tingaðust við Jenis av Rana og Bill Justinussen.

Poul Michelsen sigur seg tó hava tosað við bæði Aksel V. Johannesen og Høgna Hoydal í dag um fundin í nátt, men hevur ikki stórvegis viðmerkingar annars. 

- Eg rokni við, at vit tosa saman aftur í annaðkvøld, tá eg eri í landinum aftur, sigur hann.

Og so ger Poul Michelsen eisini greitt, at tær avtalur, sum eru gjørdar við Sjálvstýri um pensjónsnýskipan og fíggjarlóg ætlar hann sær at halda.