Ivamál, hvør eigur tænastuna, tí eru tvey tilboð

Ivamál gjørdu, at bæði landið og kommunurnar hjálpa fólki, yngri enn 67 ár, sum hava brúk fyri røkt.

Ætlanin var annars, at kommunurnar skuldu eiga økið, tá tað varð flutt í 2015.  

Men nøkur ivamál gjørdu, at Almannaverkið noyddist at taka við aftur og gera nýggjar skipanir, sum líkjast teimum, kommunurnar bjóða.

Landið og kommunurnar bjóða tí somu tænastur, og samstarv er millum partarnar.

Tað sigur Eyðgunn Samuelsen, landsstýriskvinna, í svari til Magnus Rasmussen, løgtingsmann, sum spurdi um tilboð til røktarsjúklingar og rørslutarnað undir 67 ár.  
 
Almannaverkið hevur boðið øllum kommunalum samstørvum um eldrarøkt og heimarøkt at keypa búpláss.

Ikki samd um prísin

Men tað hevur illa borið til, tí eingi pláss hava verið tøk at keypa. 

Haraftrat er ikki semja um rætta prísin fyri eitt búpláss. 

Fólk, sum hava rørslutarn ella eru røktarsjúklingar, og sum Markamóts-nevndini sigur hava rætt til tilboð frá Almannaverkinum, fáa tí eitt tilboð, har Almannaverkið hevur eitt pláss tøkt. 

Var hendan uppgávan hjá kommununum, kundu fólk oftari fingið tilboð um pláss tætt við, har tey annars búgva, stendur í svarinum úr Almannaráðnum.