Setrið ongar pengar

Tað siga Sigurð í Jákupsstovu, rektari, og Ólavur Ellefsen, formaður í stýrinum fyri Fróðskaparsetrið, í einum almennum skrivi, nú fíggjarnevndin viðger fíggjarlógaruppskotið fyri 2018.

Fróðskaparsetrið hevur gjørt vart við, at til tess at varðveita verandi virksemi, er neyðugt, at játtanin verður 94,6 milliónir kr.

Men á fíggjarlógaruppskotinum eru bara settar av 87,4 milliónir kr., ella sjey milliónir minni enn tað, sum stovnurin hevur biðið um, og umleið 20 milliónir kr. minni enn tað, sum er neyðugt fyri at menna virksemið á Setrinum, siga Sigurð í Jákupsstovu og Ólavur Ellefsen.

Í heildarætlanini um fólkavøkstur frá 2013 verður mælt til, at játtanin til Fróðskaparsetrið stigvíst verður hækkað úr 67 milliónum upp í 100 milliónir kr. frá 2014 til 2016.

Politiska skipanin hevur hækkað játtanina eitt sindur, og stig eru eisini tikin til tess at útvega betri hølisumstøður. 

Men játtanin hevur ikki samsvarað við vøksturin av lesandi og talið av útbúgvingum, siga rektarin og stýrisformaðurin. 

Støðugt fleiri lesandi á Setrinum

Í løtuni eru umleið 1.000 lesandi á Fróðskaparsetrinum.

Síðani 2013 eru 400 lesandi komin aftrat, sjey nýggjar útbúgvingar eru settar á stovn, og aðrar útbúgvingar eru styrktar og víðkaðar, men játtanin er bara vaksin 18 milliónir kr.

Úrslitið er, at Fróðskaparsetrið er komið í eina støðu, har tað ikki einans er ógjørligt at tryggja menning, men eisini at verandi virksemi er álvarsliga tarnað.

Hækkar játtanin ikki, merkir tað, at ein av høvuðsstuðlinum undir varandi framburði og fólkavøkstri í landinum er álvarsliga hóttur.

Og ein møgulig avleiðing verður, at Fróðskaparsetrið heilt ella partvíst noyðist at gevast við at taka lesandi í 2018, siga Sigurð í Jákupsstovu, rektari, og Ólavur Ellefsen, formaður í stýrinum fyri Fróðskaparsetrið.