Framsókn fer at viðgera støðuna næstu dagarnar

Júst sum samgongan í Vinnunevndini helt, at nú var komið undir land við fiskivinnunýskipanini, boðaði tann eini samgonguflokkurin, Framsókn frá, at hann var ikki so glaður fyri álitið hjá Vinnunevndini.

Framsókn hevur ikki fólk í Vinnunevndini.

Menningarkvotan, ella økiskvotan, sum hon eisini verður nevnd, er komin upp á 8,5 prosent. 

Framsókn vil ikki hava hesar kvotur, men góðtók tó fimm prosent og við ringum tannabiti sjey prosent, sum semjan í samgonguni í summar sigur.

Onga viðmerking

Onnur tingkvinnan hjá Framsókn, Hanna Jensen, segði við Útvarpið í gjárkvøldið, at tey eru ikki nøgd í flokkinum.

Tey mugu tosa um støðuna, sum hon nú er vorðin, áðrenn onnur viðgerð verður fríggjadagin og atkvøðast skal. 

Ruth Vang, sum er hin tingkvinnan hjá Framsókn, hevur onga viðmerking um fiskivinnunýskipanina.

Formaður floksins, Poul Michelsen, er staddur uttanlands, men hann kemur heim í morgin, sigur hann. Og tá fara tey í flokkinum at viðgera málið. 

Páll á Reynatúgvu váttar, at tingfundur verður fríggjadagin.