Ikki rætt at strika avreiðingargjaldið

Tað er ikki rætt at strika avreiðingargjaldið fyri landingar uttanlands, tí endamálið eigur at vera at fáa sum mest í land í Føroyum.

Tað siga andstøðumenninir í Vinnunevndini hjá løgtinginum, nú Høgni Hoydal, landsstýrismaður, fyribils ætlar at strika avreiðingargjaldið, sum er tvær krónur fyri kiloið, so skipini, sum fiska sild og makrel, sleppa av við fiskin. 

Endamálið hjá Fiskimálaráðnum við at strika avreiðingargjaldið er fyrst og fremst at fáa meira av norðhavssildini til matna, nú móttøku-orkan á landi í Føroyum er skerd, tí Varðin Pelagic brendi.

Andstøðan sigur, at til ber at virka allan fiskin í Føroyum, so tað er óneyðugt, at skipini landa uttanlands.

Serliga nú, tá ófiskað kvota kann flytast til næsta ár.  

Onnur viðgerð er á skránni fyri tingfundin í morgin.