Íslendingar fingið fleiri atgongumerki til HM

At byrja við fekk Ísland 3.200 atgongumerki at selja íslendingum.  Men áhugin fyri at keypa atgongumerki er størri, enn talið av atgongumerkjum, og tí verður neyðugt við lutakasti.

24 tímar eftir, at sølan byrjaði, høvdu 3.550 íslendingar søkt um atgongumerki, - tað sigur talsmaður fyri FIFA.

Hóast leikvøllirnir, har Ísland skal spæla, hava pláss fyri 45-túsund áskoðararum, so hava íslendingar bara fingið átta prosent av samlaðu atgongumerkjunum, - sum svarar til 3.200 pláss. 

Fleiri atgongumerki

KSÍ hevur, saman við øðrum tjóðum, verið í samband við FIFA og biðið um at fáa størri part enn bara 8 prosent, og nú hevur Ísland fingið 1.365 atgongumerki aftrat teimum 3.200.

Sostatt er nú talan um góð 5.000 atgongumerki til íslendingar at kasta lut um.

Ísland, sum í løtuni er á 21. plássi í almennu stigatalvuni hjá FIFA, er í D-bólkinum, og skal spæla móti Argentina í Moskva 16. juni, Nigeria í Volgograd 22. juni og Kroatia í Rostov 26. juni.

Evsta mark at søkja um atgongumerki er 31. januar til innleiðandi dystirnar, og eisini um Ísland kemur víðari í kappingini, skrivar RUV.