Pedagogar í verkfall

Pedagogfelagið lýsti verkall fyri hesar starvsbólkar leygarkvøldið, eftir at Pedagogfelagið, Fíggjarmálaráðið og Kommunala arbeiðgevarafelagið høvdu vrakað semingsuppskotið, sum semingsmenninir løgdu fyri partarnar.

Men í gjár svaraði Kommunala arbeiðsgevarafelagið aftur við at lýsa verkbann hósmorgunin.

Verkbannið ber í sær, at øll starvsfólk á ansingarstovnum og frítíðarskúlum verða send til hús.

Hetta stigið verður tikið til tess at at fáa Pedagogfelagið aftur til samráðingarborðið, sigur Annika Olsen, forkvinna í Kommunala arbeiðsgevarafelagnum og borgarstjóri í Tórshavnar Kommunu.

Eingir stovnar hjá Almannaverkinum lata aftur í dag, men neyðugt hevur verið at fáa fólk fyribils at vera leiðarar, nú Pedagogfelagið hevur boðað frá verkfalli.

Tað sigur Edvard Heen, stjóri í Almannaverkinum.

Almannaverkið hevur 12 eindir, og tað eru serliga Eind 1, sum er í Klaksvík, og Eind 6 sum er í Havn, sum verða raktar, tí leiðararnir fara í verkfall. Men á hesum stovnum eru onnur fólk, sum kunnu vera leiðarar.

Á fimm av eindunum eru leiðararnir tænastumenn, so tey fara ikki í verkfall.