Stóru londini í Evropa óttast skattaskipan

Nú ávara fimm tey størstu londini í Evropa Donald Trump, forseta, um skattaskipanina, sum hann ætlar at seta í verk, tí tað fer at fáa álvarsligar fylgjur fyri heimshandilin. Talan er um Týskland, Frakland, Bretland, Italia og Spania.

Tað eru serliga tríggjar greinar í lógaruppskotinum, sum londini eru misnøgd við, og sum eru til viðgerð í kongressini.

Tær tríggjar greinarnar stríða allar ímóti samtyktum, sum USA hevur gjørt, og tær kunnu ávirka heimshandilin í stóran mun.

Teir 28 fíggjarmálaráðharrarnir í ES londunum hava fyrr gjørt vart við sína misnøgd um somu greinar, og teir siga, at hesar fara at avlaga heimshandilin.

Skattalógin er til viðgerðar í kongressini, og hon fer at lækka skattin í USA við 12.000 milliardum kr tey næstu 10 árini.

Uppskotið fer at lækka skattin hjá fyritøkum og teimum múgvandi, sum Donald Trump og republikanski flokkurin standa fyri.

Umboðsmanntingið samtykti uppskotið í november og 2. desember samtykti senatið eisini uppskotið eitt sindur broytt, og tey bæði uppskotini skulu nú samansjóðast í kongressini, áðrenn Donald Trump, forseti fær lógina at skriva undir, og sum so kann setast í verk. Kongressin ætlar at vera liðug við viðgerðina fyri jól.