Sáttmálin við Varðan Pelagic tann størsti higartil

Sáttmálin, sum Varðin Pelagic á Tvøroyri hevur gjørt við íslendsku fyritøkuna Skaginn 3X um maskinur til virkið á Tvøroyri, er tann størsti, sum fyritøkan á Akranesi nakrantíð hevur gjørt.

Nýggja virkið á Tvøroyri fer at kunna arbeiða 1700 tons um samdøgrið. Tað gamla kundi pakka 1300 tons um samdøgrið.  

Skaginn 3X seldi og setti eisini upp maskinurnar í Varðanum Pelagic í 2012. Tá var Varðin størsta og best útgjørda virki av sínum slagi í heiminum.

Besta loysnin 

Við blaðið Fiskifréttir sigur Bogi Jacobsen, stjóri á Varðanum Pelagic, at loysnin hjá Skaganum 3X er tann besta.

Ingólfur Árnason, stjóri í Skaganum 3X, sigur, at sáttmálin við Varðan Pelagic er tann størsti hjá teimum og sær vitandi eisini tann størsti, sum ein íslendsk fyritøka, sum ger tøkni til fiskivinnuna, hevur gjørt. 

Fleiri íslendskar fyritøkur, millum annað Frost og Rafeyri á Akureyri, skulu eisini lata útgerð til virkið á Tvøroyri.