Landsroyndir í fólkaskúlanum rigga ikki nóg væl

Landsroyndirnar rigga ikki nóg væl. Tað er niðurstøðan hjá tveimum donskum granskarum og professarum, Svend Kreiner og Jeppe Bundsgaard.

Niðurstøðuna hava teir almannakunngjørt í opnum brævi til danska undirvísingarmálaráðharran, Merete Riisager.

Í Danmark skulu næmingar, úr 2. til 8. flokk, gjøgnum tilsamans 10 landsroyndir av ymsum slag. Næmingarnir verða vigaðir og mettir í støddfrøði, enskum, landalæru, lívfrøði, alis- og evnafrøði og donskum.

- Lærararnir gera hesar royndirnar fyri at finna útav, hvat næmingarnir ikki duga. Men um lærarar brúka undirvísingartíðina til at læra næmingarnar at loysa uppgávurnar í hesum landsroyndum, so finna lærararnir ikki útav, hvat næmingarnir ikki duga, sigur Svend Kreiner.

Granskarin vísir á, at lærararnir leggja seg eftir at læra næmingarnar at loysa uppgávurnar í landsroyndunum. 

- So undirvísingartíðin fer við at fyrireika næmingarnar til hesar royndirnar. Tað fer tíðin við, heldur enn til dømis at læra næmingarnar at lesa og rokna, sigur Svend Kreiner.

Teir báðir granskararnir mæla til, at lærarin sjálvur ger av, nær neyðugt er at testa næmingarnar. 

Eisini skulu lærarar hava møguleika at velja landsroyndirnar frá, um teir meta tað vera meira átrokandi at brúka undirvísingartíðina á annan og eftir teirra tykki meira skilagóðan hátt.