Skúlin kostar meira enn kommunan vil lata

Eftir at hava roknað aftur og fram nógvar ferðir, er niðurstøðan hjá smápartafelagnum Heildarverki í Fuglafirði, at nýggi skúlin fer at kosta meira, enn kommununan hevur sett av. 

Tí hevur felagið boðað Fuglafjarðar kommunu frá, at felagið fer úr partalagssamstarvinum um at byggja nýggja skúlan.

Felagið ger tó betongarbeiðið liðugt.

Tórfinn Nón, stjóri í Heildarverki, sigur, at niðurstøðan hjá felagnum er, at ikki ber til at byggja skúlan fyri 101 millión krónur, sum kommunan ætlar.

Heildarverk hevði undirveitarar til arbeiðið. 

Nakrar milliónir 

Tórfinn Nón vil ikki siga, hvussu nógvir pengar skilja partarnar, men talan er um nakrar milliónir, sigur hann.

Hitt arbeiðið, sum annars var í partalagssamstarvinum við Heildarverk, skal kommunan nú bjóða út í vanligum útboði.

Tað verður gjørt í vár, sigur borgarstjórin, Sonni á Horni.

Fuglafjarðar kommuna væntar ikki, at hetta fer at ávirka tíðarætlanina.

Skúlin skal verða liðugur á sumri 2020.

Býráðið hevur játtað 101 millión krónur til skúlan.

Um hann nú fer at kosta meira, ber ikki til at siga, fyrr enn tilboðini eru komin inn, sigur borgarstjórin.