Gjørt sáttmála um arbeiðið við Akursmørk

Klaksvíkar kommuna og byggifelagið Kanjon hava skrivað undir sáttmála um arbeiðstøku í samband við lundina á ovara Vágsbøi fyri knappa millión. Tað skrivar kommunan á heimasíðuni.

Lundin fer í fyrstu atløgu at fevna um á leið triðingin av ovara Vágsbøi, og talan er um tann partin av Akursmørk, sum er næstur Sparikassanum. 

Fyrsti partur av arbeiðnum er jørðarbeiði, umframt at leggja ein lítlan part av Ósánni um. Jørðarbeiðið byrjar í mars og skal eftir ætlan vera komið somikið áleiðis í mai, at plantingin kann byrja í samband við árliga umhvørvisátakið í mai, sæst á heimasíðuni hjá Klaksvíkar kommunu.