Leitar eftir høli til Tjóðsavnið í miðbýnum í Havn

Mentamálaráðið er farið at leita eftir hølum í miðbýnum í Havn til Fornminnissavnið og Náttúrugripasavnið.

Tað segði Rigmor Dam, landsstýriskvinna, tá nýggi samleikin hjá Tjóðsavninum varð almennur í gjár.

Rigmor Dam segði, at leingi hava søvnini viljað havt betri høli, bæði til goymslu, starvsfólk og framsýningar. 

Eitt nú vilja tey hava framsýningarhøli í miðbýnum í Havn, so fleiri lættari kunnu støkka inn á gólvið at læra um okkara ríku mentanarsøgu og náttúruríkidømi. 

Eisini vilja søvnini, at starvsfólkini á Fornminnissavninum og Náttúrugripasavninum sum skjótast koma undir somu lon at arbeiða.

Rigmor Dam segði, at tey í Mentamálaráðnum longu eru farin undir at kanna møguligar loysnir hesum viðvíkjandi. 

Og hon lovaði, at hennara lutur skuldi ikki liggja eftir.