Forsetaval í Russlandi

Forsetaval er í Russlandi í dag. Tað er púra greitt, at Vladimir Putin, sum er forseti, verður endurvaldur.

Einki av mótvalevnunum er mett at fáa meiri enn 10 prosent av atkvøðunum. Hinvegin bendir alt á, at Vladimir Putin fer at fáa væl meiri enn 50 prosent av atkvøðunum. Og fær hann tað, verður ikki neyðugt við eini øðrum umfari.

Av tí, at eingin spenningur er um sjált valúrslitið, eru fólk mest spent upp á vallutøkuna. Myndugleikarnir bera banga fyri, at tá eingin ivi er um úrslitið, missa fólk hugin at fara á val. Og ein lág valluttøka kann tulkast sum eitt tekin um, at russarar hava mist trúnna á forsetan, politikk hansara og skipanina sum heild.

Danmarks Radio skrivar, at málið hjá Kreml hevur verið 70/70. Altso at forsetin sjálvur skuldi fáa minst 70 prosent av atkvøðunum, og valluttøkan skuldi vera tað sama, minst 70 prosent.

Men hesi mál eru broytt. Myndugleikarnir eru nøgdir, um valluttøkan er 65 prosent. Tað er tað sama sum í 2012.