- Tíðindi, mentan og ítróttur
Altjóða eygleiðarar finnast at russiska valinum
![](https://kvf.fo/sites/default/files/styles/grein-ovasta-mynd/public/1474224097_scanpix-20160918-124142-3_1.jpg?itok=LCXUSKhu)
Altjóða valeygleiðarar finnast at russiska forsetavalinum sunnudagin.
Eygleiðararnir í felagsskapinum fyri trygd og samstarvi í Evropa, OSCE, siga, at eingin mótstøða var í valinum, og tí var ikki talan um eitt veruligt val.
Eygleiðararnir siga eisini, at einvísa valstríðið hevði við sær, at onnur valevni sluppu ikki upp í part.
Forkvinnan í russisku valnevndini, Ella Pamfilova, sigur hinvegin, at bara fá dømi eru um, at alt fór ikki rætt fram á valinum.
- Valúrslitini á fimm valstøðum í trimum russiskum landspørtum eru ógildað, sigur forkvinnan í valnevndini fyri tíðindastovuni Tass.
Vladimir Putin fekk 77 prosent av atkvøðunum á forsetavalinum sunnudagin, og hann kann tí halda fram sum forseti í Russlandi í seks ár aftrat.