Verkfall í Danmark ávirkar ikki Atlantsflog

Danska Veðurstovan, DMI, er millum stovnarnar, sum verður rakt av ætlaða verkfallinum og verkbanninum. DMI er einasti góðkendi veðurstovnur, sum kann lata flogvøllum í ríkisfelagskapinum veðurforsagnir.

Hetta hevur millum annað við sær, at flogferðslan í Grønlandi verður ávirkað. 

Tað fær tó onga ávirkan á tornið á flogvøllinum í Vágum, um verkfall verður í Danmark, sigur flogovastin hjá Atlantsflogi, Sámal Danielsen.

- Í Vágunum hava vit møguleika fyri at flúgva allíkavæl, hóast vit ikki fáa langtíðarforsøgnina, sum DMI vanliga ger, sigur hann.

Tveir eyka flogvøllir tøkar 

At danska verkfallið og verkbannið ikki ávirkar flúgvingina til Føroyar kemst av, at flogfør, ið seta kósina hendan vegin, altíð skulu hava eyka flogvøllir tøkar. 

- Tá vit seta kós ímóti Vágunum til dømis úr Danmark, so hava vit skyldu til at hava tveir flogvøllir tøkar afturat Vága Floghavn, og tað merkir so, at veðrið í teimum flogvøllunum sjálvandi skal vera nøktandi, áðrenn vit kunnu seta kós ímóti Føroyum, sigur Sámal Danielsen.

Kann ávirka flúgvingina, um starvsfólkini á flogvøllinum fara í verkfall

So leingi tað bara er talan um starvsfólkini á DMI, sum fara í verkfall, so ávirkar tað ikki flúgvingina til Føroyar. Men fara onnur starvsfólk á flogvøllunum í Danmark í verkfall ella verkbann, so kann tað ávirka flúgvingina, sigur flogovastin hjá Atlantsflogi, Sámal Danielsen.

- Vit kunnu saktans flúgva uppá Føroyar, tí tornið í Vágunum verður ikki ávirkað av verkfallinum í Danmark. Um starvsfólk leggja arbeiðið niður á flogvøllinum í Keypmannahavn, eitt nú við at koyra ferðafólk umborð ella viðføri og so víðari, so fáa vit ikki gjørt so nógv við tað, sigur hann.

Verkfall verður í Danmark 4. apríl, um semja ikki fæst í lag millum fakfeløgini og statin og kommunurnar. Verkbann er lýst at koma í gildi tann 10. apríl.