Luksemburg tekur sendiharra heim

Tað boðar uttanríkisráðið í Luksemburg frá.

Bretland og onnur ES-lond halda, at alt bendir á, at Russland skipaði fyri álopinum á fyrrverandi njósnaran, Sergej Skripal, og dóttur hansara, Juliu.

Umleið 20 ES-lond hava víst russiskum diplomatum av landinum, teirra millum Danmark. Og USA hevur gjørt av at vísa 60 russiskum diplomatum av landinum.

Í gjár avgjørdi Nato at vísa sjey russarum, sum starvast á russisku deildini í Nato, av landinum.

Bretar siga, at nervaeitrið Novichok var brúkt at eitra Skripal og dóttur hansara í enska býnum Salisbury 4. mars. Tey vórðu funnin uttan vit á einum beinki í býnum. 

Novichok varð í sínari tíð ment í Sovjetsamveldinum, og tí er Russland undir illgruna fyri at hava eitra Sergej og Juliu Skripal.