Málið um deyðan mann í Fuglafirði er ikki endað

Løgreglan kannar framvegis málið um Eyðfinn Esbernson Poulsen, sum varð funnin deyður í sjóvarmálanum við Breiðá í Fuglafirði.

Tað upplýsir Hildur Hentze, leiðari á Kriminaldeildini hjá løgregluni. 

Hon leggur kortini dent á, at einki bendir á, at nakað brotsverk er framt.

Tað er vanligt, at tað tekur nakrar vikur at avgreiða eitt tílíkt mál, sigur Hildur Hentze.

Eitt nú bíða tey enn eftir úrslitum av ymiskum royndum, sum eru tiknar.

Løgreglan vil tó fegin frætta frá fólki, sum halda seg hava sæð Eyðfinn Esbernson Poulsen frá tí, at hann hvarv leygardagin 10. mars, til hann varð funnin dagin eftir í sjóvarmálanum við Breiðá í Fuglafirði.