Umhvørvisstovan viðhald

Hægstirættur hevur givið Umhvørvisstovuni, sum umsitur matrikulering, viðhald í einum sakarmáli, sum Tórshavnar kommunu fekk loyvi til at royna í Hægstarætti eftir at hava tapt í Føroya rætti í 2015 og í Landsrættinum í 2016. 

Sambært Hægstarætti eru matrikulgjøldini lóglig, kunngerðin um matrikulgjøld er ein nóg góð heimild fyri gjaldsásetingunum hjá Umhvørvisstovuni, og virðið á byggibúnum grundstykkjum skal leggjast til grund fyri gjaldsásetinga. 

Í grundgevingunum fyri dómin sigur Hægstirættur, at gjøldini fyri matrikulert arbeiði hvørki eru í stríð við grundlógina ella stýrisskipanarlógina, og neyðugt er ikki at áseta matrikulgjøldini í lóg. 

Tórshavnar kommuna noktaði at gjalda

Sakarmálið er um eina rokning fyri matrikulert arbeiði í sambandi við eina stóra útstykking í Hoyvík - útstykkingina við Myllutjørn.

Samsýningin er 2% av marknaðarvirðinum á grundstykkjunum.  

Tórshavnar kommuna noktaði at gjalda rokningina. Kommunan segði, at heimild ikki var fyri at taka slík gjøld. 

Rokningin ov stór

Í øðrum lagi segði kommunan, at rokningin frá Umhvørvisstovuni var alt ov stór. 

Umhvørvisstovan stevndi so Tórshavnar kommununu eftir pengunum og fekk viðhald á øllum trimum rættarstigum.

Tórshavnar kommuna er eisini dømd at rinda Umhvørvisstovuni 75.000 kr. í sakarkostnaði í sambandi við viðgerðina í Hægstarætti.