Hevði Darwin rætt? Føroyar eitt undantak í Evropa

Helmingurin av føroyingum vrakar menningarlæruna, sum upprunaliga varð sett fram av Charles Darwin í 1859. Menningarlæran er læran um, at alt lív hevur ein felags uppruna, og at alt lív hevur ment seg ígjøgnum milliardir av árum.

Mótstøðan ímóti menningarlæruni verður staðfest í eini kanning um trúgv og lívsáskoðan, sum Kringvarpið hevur gjørt saman við greiningarfyritøkuni Lóður í sambandi við nýggju sjónvarpsrøðina Gud signi Føroyar.

darwin_mynd_1.png

Globalt á einum fimta plássið

Fyri at kunna samanbera við onnur lond er hesin spurningurin umsettur orð fyri orð eftir eini altjóða kanning hjá stóru ensku hagtalsfyritøkuni Ipsos Mori.

23 lond úr øllum heimspørtum luttóku, og tá vit koyra Føroyar inn í kanningina, sæst, at Føroyar eru millum tey londini í heiminum, har flest fólk vraka menningarlæruna og halda, at gud skapti menniskjuni.

Føroyar eru á fimta plássi eftir Saudi Arabia, Turkaland, Indonesia og Suðurafrika.

darwin_globalt.png

Føroyar eitt eindømi í Evropa

Um vit bara hyggja at evropeisku londunum í kanningini, sæst, at talið av kreationistum er nógv tað hægsta í Føroyum.

Føroyar eru altso eitt eindømi í Evropa í mun til spurningin um evolutión ella skapan.

darwin_evropa.png

Greiningarfyritøkan Lóður gjørdi kanningia á sumri í 2017, og 532 tilvildarliga vald fólk ímillum 15 og 75 ár luttóku.