Ísrael leggur Iran undir at lúgva

Ísraelski forsætisráðharrin Benjamin Netanyahu helt í gjárkvøldið sjónvarpsrøðu, har hann vísti fram tað, sum hann kallar "loynilig kjarnorku-skjøl", og sum hann segði prógva, at Iran í loyndum enn roynir at fáa kjarnorkuvápn.

Netanyahu segði, at ísraelska fregnartænastan hevur fingið hendur á 55.000 síðum av tilfari, sum vísa, at Iran hevur logið fyri altjóða samfelagnum síðani avtalan um kjarnorkuvápn varð undirskrivað í 2015.

Iran skrivaði undir avtaluna afturfyri at umheimurin setti revsitiltøkini móti landinum úr gildi.

Iranski uttanríkisráðharrin, Javad Zarif, skrivaði fyrr um dagin á Twitter, at Netanyahu roynir at "lumpa fólk".

Netanyahu tosaði enskt, tá hann úr verjumálaráðnum í Tel Aviv vísti skjøl, sum hann segði vóru nágreinilig avrit av loyniligum skjølum, ið ísraelska fregnartænastan hevur fingið hendur á úr Teheran.

- Hesi skjølini prógva til fulnar, at Iran leyg púra skammleyst, tá landið segði seg ongantíð hava havt eina kjarnorkuvápna-ætlan, segði ísraelski forsætisráðharrin í røðu síni.