Revsitiltøk móti Iran sett í verk

Tiltøk verða sett í verk móti seks persónum og trimum feløgum.

Amerikanska fíggjarmálaráðið sigur, at persónarnir og feløgini hava flutt milliónir av dollarum til iransku kollveltingarhirðuna og hava fíggjað óndsinnað virksemi, sum USA tekur til.

Peningurin er fluttur gjøgnum Sameindu Arabisku Emiratini og iranska tjóðbankan, sigur amerikanska fíggjarmálaráðið.

Tiltøkini bera í sær, at ikki er loyvt at hava handilslig viðurskifti við teir seks persónarnar og tær tríggjar fyritøkurnar, og tiltøkini verða sett í verk í samstarvi við Sameindu Arabisku Emiratini. 

Iranska tjóðarhirðin varð stovnað, stutt eftir at Khomeini, ayatollah, tók valdið í Iran í 1979.

Síðani hevur hon fingið sera stórt vald í landinum, bæði hernaðarliga og búskaparliga. Tjóðarhirðin hevur fleiri túsund hermenn og framkomna hernaðarútgerð.