Tórshavnar kommuna tekur undir við kravgongu

Tórshavnar kommuna tekur undir við teimum, sum skipa fyri kravgongu í Tinganesi seinnapartin um vánaligu samferðsluviðurskiftini til útoyggjarnar

Annika Olsen, borgarstjóri, sigur í tíðindaskrivi, at farleiðin út í Hest er so niðurraðfest nú, at livandi er ikki í oynni, og verður einki gjørt, verður Hestur skjótt manntóm.

Eisini í Nólsoy er farleiðin ov óálítandi, heldur borgarstjórin. Ternan er lívsæðrin hjá nólsoyingum, men alt ov ofta er skipið í sigling aðrastaðni, ella verður ferðaætlanin ikki hildin. 

Onnur óegnað skip verða sett í sigling, og harumframt mugu avloysaraskipini avlýsa túrar fyri veður, sum Ternan ikki hevði avlýst.

At nólsoyingar hava so óálítandi ferðasamband, kann Tórshavnar kommuna ikki góðtaka, sigur Annika Olsen.

- Vit skilja trupulleikarnar á útoyggj. Skulu vit varðveita mentanarliga fjølbroytnið í øllum landinum, mugu landsmyndugleikarnir sýna størri virðing fyri øllum farleiðum, har sjógvur skilir oyggjarnar, sigur borgarstjórin í Havn.