ES við móttiltøkum

BBC skrivar, at ES hevur gjørt ein lista upp á 10 síður við amerikanskum vørum, sum skulu tollast. Talan er eitt nú um Harley Davidson-motorsúkklur og nógvar ymsar matvørur.

Eisini ætlar ES at kæra málið til Alheims Handilsstovnin, WTO.

Donald Trump hevur sagt, at tollurin skal verja amerikanskar stálframleiðarar, og at hetta er alneyðugt fyri landsins trygdarstøðu.

Franski forsetin, Emmanuel Macron, ringdi sambært BBC í gjárkvøldið til amerikanska forsetan og segði honum, at tollurin er "ólógligur", og somu vending brúkar formaðurin í altjóða handilsnevndini hjá ES-parlamentinum, Bernd Lange.

Hann sigur, at avgerðin hjá Trump vísir, at forsetin ikki er sinnaður at halda galdandi reglur.

Peter Altmaier, sum er týskur búskaparmálaráðharri, vónar, at eitt sterkt móttiltak frá ES fer at fáa Donald Trump at umhugsa sína avgerð av nýggjum.