Saudi Arabia loyvir kvinnum at koyra bil

Mett verður, at einar 2.000 kvinnur fara at taka koyrikortið í næstu viku. 

Salman-kongur boðaði í fjør heyst frá, at elligamla saudi-arabiska bannið móti, at kvinnur sleppa at koyra bil, - og sum er eindømdi í øllum heiminum, men er í samsvari við islamska lóg, verður ógildað.

Krevja rættindi

Hóast hetta bannið nú fer í søguna, so er frælsi hjá kvinnum framvegis skert meira, enn nógva aðrastaðni í heiminum. 

Í mai-mánaði vórðu fleiri kvinnur handtiknar, eftir at tær høvdu skipað fyri mótmælistiltaki, har tær kravdu fleiri rættindi í landinum, - millum annað at sleppa at koyra bil.

Tær eru nú skuldsettar fyri at hava sett trygdina hjá Saudi Arabia í vanda, og kunnu verða dømdar upp í 20 ára fongsul. 

Skot fyri bógvin

Handtøkurnar hava tó sátt iva um trúnna á nýskipanartilgongdina hjá Muhamed-krúnprinsi, sum í løtuni er valdmiklasti maður í Saudi Arabia. Hann hevur víst góðan vilja at flyta og menna samfelagið til eitt meira framkomnar og liberalan heim.

Nú kunnu so kvinnur, sum eru 18 ár og eldri, søkja um at fáa koyrikort, og koyriskúlar fyri kvinnur eru settir á stovn í fimm av størru býunum.

Koyrilærarar verða kvinnur, sum hava tikið koyrikort uttanlands.