Bústaðarskyldan í Havn aftur á skrá hjá býráðnum

Ov nógv hús á Reyni í Havn eru tóm tað mesta av árinum, tí eingin býr í teimum.

Nú ger kommunan tí enn eina roynd at fáa hetta broytt við bústaðarskyldu. 

Bústaðarskylda í ávísum býlingum krevur tó lógarheimild.

Býráðið í Havn fer á fundinum mikukvøldið at taka støðu til uppskot hjá Byggi- og býarskipanarnevndini og Fíggjarnevndini um at biðja landsstýri og løgting útvega neyðugu lógarheimildina. 

Hetta er tó ikki bara galdandi fyri hús á Reyni. 

Í løtuni verða nógvír nýggir bústaðir bygdir í kommununi.

Fyri at lofta trupulleikanum við tómum húsum, sum eisini kann gerast ein størri trupulleiki í nýggju býlingunum, er málið vorðið búgvið til at taka spurningin viðvíkjandi bústaðarskyldu upp aftur til viðgerðar, stendur í skánni fyri býráðsfundin mikukvøldið. 

Har stendur eisini, at roknast kann við, at hús verða keypt at leiga ferðafólki.

Ognarskattur

Bústaðarskyldan kann tí eisini varpa ljós á møguleikan at áseta ognarskatt á hús nummar tvey hjá fólki.

Mælt verður eisini til at heita á Kommunufelagið um at kanna, um bústaðarskylda kann áleggjast í byggisamtyktum. 

Tórshavnar býráð hevði eisini spurningin um bústaðarskyldu í miðbýnum í Havn frammi í 2014.

Tá feldi býráðið eitt uppskot um at heita á landsstýrið um at útvega kommununum lógarheimild at seta krav um bústaðarskyldu.

Meirilutin vísti á eitt løgfrøðiligt upprit hjá Løgdeildini hjá býráðnum, sum staðfesti, at kommunur hava onga heimild til at krevja bústaðarskyldu.

Býráðið samtykti eisini at mæla frá at seta bústaðarskyldu á hús, sum kommunan sjálv selur í miðbýnum í Havn.