- Tíðindi, mentan og ítróttur
Dømdir húsavarðhald fyri at hava fleiri konur
Hetta eru fyrstu fleir-giftudómar í Kanada í meira enn 100 ár.
Annar av monnunum er dømdur at sita seks mánaðir í húsavarðhaldi og hin í tríggjar mánaðir, sigur CBC-News.
Annar maðurin hevur gift seg við 24 kvinnum millum 1990 og 2014 sambært rættarskjølum. Kanadiskir fjølmiðlar siga, at hann er pápi at í minsta lagi 146 børnum.
Verjin hjá manninum sigur, at dómurin varð strangari, enn hann hevði roknað við, men ikki órímiligur. Hann sigur, at maðurin hevur verið í ringari støðu at skula velja millum at fara frá familju síni ella at halda fram við at bróta lógina.
Hin maðurin, sum skal sita tríggjar mánaðir í húsavarðhaldi, giftist fimm kvinnum millum 1993 og 2009.
Revsingin hjá monnunum fyri polygami fevnir eisini um 12 mánaðar treytaðan dóm.
Báðir eru fyrrverandi leiðarar í trúarfelagsskapinum, The Fundamentalist Church of Jesus Christ of Latter-day Saints, sum er sprottin úr Mormonkirkjuni í stóra átrúnaðarliga samfelagnum Bountiful í landssynnings Kolumbia.
Sambært kanadiskari lóg er revsingin fyri at gifta seg við fleiri er fimm ára fongsul. Báðir menninir noktaðu seg sekan í rættinum, har annar av monnunum segði, at polygami-lógin ger seg inn á trúarfrælsið.
Hóast fleiri skuldsetingar eru um kynslig brotsverk í Bountiful, har umleið 1.500 fólk búgva, hava myndugleikarnir higartil ikki skuldsett nakran - vísandi til lógina um trúarfrælsi.
Mormonkirkjan, sum The Fundamentalist Church of Jesus Christ of Latter-day Saints er sprottin úr, bannaði fleirgiftu longu í 1890.